Hefin Archer-Williams (CY)

Why choose me

Ar ôl cyfnod o hyfforddiant eang, fe wnes i sylweddoli’n fuan taw delio ag anghydfodau oedd y maes i mi. Ym mhob achos, dwi’n ceisio edrych yn fanwl ar bob agwedd o fyd cwmni neu unigolyn gan wrando’n astud ar eu nodau personal a masnachol, cyn egluro’r camau cyfreithiol ac ymarferol sydd ar gael er mwyn datrys y broblem.

Mae hyn yn hynod wobrwyol i mi’n bersonol tra’n fy ngalluogi i amddiffyn fy nghleientiaid yn ystod amseroedd anodd ac ansicr. Mae hynny felly yn meithrin dulliau cydweithredol o weithio gyda fy nghleientiaid er mwyn rheoli’r risg ac osgoi ymgyfreitha ble bynnag mae hynny’n bosib.

Dwi felly’n ceisio darparu’r gwasanaeth gorau posib i’m cleientiaid a meithrin perthnasoedd cadarn gyda hwy. Dwi’n aml yn delio â materion sy’n ymwneud â thrafod telerau cytundebau, anghydfodau masnachol – yn ymwneud â materion egni – a hefyd anghydfodau cymhleth ynglŷn ag ewyllysiau ac ymddiriedolaethau. Dwi hefyd yn gweithio gydag unigolion fel cyfreithwyr a chyfrifyddion sy’n wynebu gwrandawiadau disgyblaethol gan eu cyrff proffesiynol.

Cefais fy ngeni a’m magu yng Nghymru a’r Gymraeg yw fy iaith gyntaf. Fel cynifer o Gymry eraill, dwi’n dwli ar chwaraeon ac wedi bod yn ddigon ffodus i ddefnyddio fy sgiliau i gynorthwyo chwaraewyr chwaraeon proffesiynol yn ystod trafodaethau telerau cytundebau ac anghydfodau, yn ogystal ag eistedd ar fyrddau a phwyllgorau grwpiau fel Chwaraeon Anabledd Cymru, Badminton Cymru, Pêl Fasged Cymru a nifer o elusennau chwaraeon. Cefais hefyd y fraint o gael fy mhenodi fel cyfreithiwr Tîm Cymru yn ystod Gemau’r Gymanwlad ym Melbourne. Yn fwy diweddar fe wnes i gynrychioli Prydain Fawr (gyda baner Cymru) fel chwaraewr yn nhwrnamaint Rygbi Cyffwrdd y Byd 2019 ym Malaysia.